Congressum Keralavum

A.K. Pillai

1893 ഏപ്രിൽ 16 ന് കൊല്ലം ജില്ലയിലെ കരുനാഗപ്പള്ളിയിൽ ജനിച്ചു. കൊല്ലം, തിരുവനന്തപുരം എന്നിവിടങ്ങളിലായിരുന്നു വിദ്യാഭ്യാസം. വിദ്യാർത്ഥിയായിരിക്കുമ്പോൾതന്നെ പൊതുകാര്യങ്ങളിൽ താല്പര്യം കാണിച്ചുപോന്നു. 1919-ൽ ബി.എ പാസ്സായശേഷം ഇംഗ്ലണ്ടിൽ ബി.സി.എൽ എന്ന ഉയർന്ന നിയമബിരുദം നേടുന്നതിനായി ബ്രിട്ടനിലെ ഓക്സ്ഫോർഡ് യൂണിവേഴ്സിറ്റിയിൽ ചേർന്നു. അതോടൊപ്പം ബാരിസ്റ്റർ പഠനവും ആരംഭിച്ചു. ഗാന്ധിജിയുടെ ആഹ്വാനമനുസരിച്ച് നിസ്സഹകരണ പ്രസ്ഥാനത്തിൽ പങ്കെടുക്കാൻ നിയമപഠനമുപേക്ഷിച്ചു. 1921-ൽ ഇന്ത്യയിൽ തിരിച്ചെത്തി. തിരുവിതാംകൂർ ജില്ല കോൺഗ്രസ്സ് കമ്മറ്റി സെക്രട്ടറിയായി തെരഞ്ഞെടുക്കപ്പെട്ടു. കോൺഗ്രസ്സിന്റെ ആദർശപ്രചരണത്തിനായി സ്വരാട് എന്ന പത്രം ആരംഭിച്ചു. വെയിത്സ് രാജകുമാരന്റെ ഇന്ത്യാസന്ദർശത്തിനെതിരെ ഹർത്താൽ സംഘടിപ്പിച്ചതിനു ജയിൽശിക്ഷ അനുഭവിച്ചു. 1922-ൽ സ്വദേശാഭിമാനി രാമകൃഷ്ണപിള്ളയുടെ പുത്രി ഗോമതിഅമ്മയെ വിവാഹം കഴിച്ചു. റിട്ട.ഗവ.കോളേജ് പ്രൊഫസർ ദേവകി, മദ്രാസ് വിമെൻസ് കോളേജ് ലൈബ്രേറിയൻ അംബിക, ചിൽഡ്രൻസ് വേൾഡ് എഡിറ്റർ രാമകൃഷ്ണൻ എന്നിവർ മക്കളാണ്. 1924-ൽ വൈക്കം സത്യാഗ്രഹത്തിൽ പങ്കെടുത്തു ജയിൽവാസമനുഭവിച്ചു. 1925-ൽ തിരുവിതാംകൂർ നിയമസഭാംഗമായി. അടുത്തവർഷം പത്രറഗുലേഷനിൽ പ്രതിഷേധിച്ച് അംഗത്വം രാജിവെച്ചു. പ്രശസ്തമായ നിലയിൽ ബാരിസ്റ്റർ പരീക്ഷ പാസ്സായി. തുടർന്ന് മദ്രാസ്, മധുര, തിരുവനന്തപുരം, റംഗൂൺ, കോഴിക്കോട് എന്നിവിടങ്ങളിൽ പ്രാക്ടീസ് ചെയ്തു. 1932-ൽ മീററ്റ് ഗൂഢാലോചനക്കേസ്സിൽ പ്രതികൾക്കുവേണ്ടി വാദിച്ചു. കോൺഗ്രസ് സോഷ്യലിസ്റ്റ് പാർട്ടിയിലും എം.എൻ റോയിയുടെ റാഡിക്കൽ ഡെമോക്രാറ്റിക് പാർട്ടിയിലും അംഗമായിരുന്നു. 1945-ൽ ലണ്ടനിൽ കോമൺവെൽത്ത് റിലേഷൻസ് കോൺഫറൻസിൽ പങ്കെടുത്തു. 1949 ഒക്ടോബർ അഞ്ചിനു നിര്യാതനായി.